Sotay Shakhs Ke Peechay Namaz Parhnay Ka Hukum

بِسْمِ اللہِ الرَّحْمٰنِ الرَّحِيْمِ

اَلْجَوَابُ بِعَوْنِ الْمَلِکِ الْوَھَّابِ اَللّٰھُمَّ ھِدَایَۃَ الْحَقِّ وَالصَّوَابِ

   سوتے شخص کامنہ اگرنمازی کی جانب ہوتوایسی صورت میں اس کے منہ کے سامنے نمازپڑھناجائزنہیں ہے اوراگراس کامنہ دوسری جانب ہواوراس کی پیٹھ پیچھے  کوئی نمازپڑھے تواس میں حرج نہیں لیکن بچنامناسب ہے ،اس کی دووجوہات ہیں :ایک یہ کہ  کیامعلوم وہ نمازکے دوران اس کی طرف کروٹ لے لے ،جس وجہ سے اس کامنہ اس کی طرف ہوجائے ۔ اوردوسری وجہ یہ ہے کہ  احتمال ہے کہ نیندکے دوران اس سے کوئی ایسی چیزصادرہو،جس کی وجہ سے اسے ہنسی آجائے ۔

   اس بارے میں اعلی حضرت امام اہلسنت امام احمد رضا خان رحمۃ اللہ تعالی علیہ فرماتے ہیں:’’ اگر کوئی شخص چارپائی پر بیٹھا خواہ لیٹا ہے اور اس طرف اس کی پیٹھ ہے تو اس کے پیچھے جا نماز بچھا کر نماز  پڑھنے میں کوئی حرج نہیں ، اسی طرح اگر اس طرف پیٹھ کیے سورہا ہے جب بھی مضائقہ نہیں ، مگر سوتے کے پیچھے پڑھنے سے احتراز مناسب ہے، دو وجہ سے، ایک یہ کہ کیا معلوم اس کے نماز پڑھنے میں وہ اس طرف کروٹ لے اور ادھر اس کا منہ ہوجائے، دوسرے محتمل ہے کہ سوتے میں اس سے کوئی ایسی شے صادر ہو جس سے نماز میں اسے ہنسی آجانے کا اندیشہ ہو ۔ المسئلۃ فی رد المحتار عن الغنیۃ ، والوجہ الاول مما زدتہ‘‘(فتاوی رضویہ جلد 5 ،صفحہ 346 ،مطبوعہ: رضا فاؤنڈیشن،لاہور)

وَاللہُ اَعْلَمُ عَزَّوَجَلَّ وَرَسُوْلُہ اَعْلَم صَلَّی اللّٰہُ تَعَالٰی عَلَیْہِ وَاٰلِہٖ وَسَلَّم