Apni Dukan Ke Samne Se Raqam Mili Tu Kya Hukum Hai?

اپنی دوکان کے سامنے سے رقم ملی تو کیا حکم ہے ؟

مجیب: محمد سجاد عطاری مدنی

فتوی نمبر:Web-857

تاریخ اجراء: 21رجب المرجب1444 ھ /13 فروری2023 ء

دارالافتاء اہلسنت

(دعوت اسلامی)

سوال

میری شاپ پر ایک ہی کسٹمر آیا ،اس کے علاوہ کوئی نہیں آیا ، آنے کے بعد وہ دوسری دوکان پر چلا گیا، اسی دوران میں نے اپنی شاپ کے سامنے کچھ رقم گری ہوئی دیکھی جو میں نے اٹھا لی کہ شاید اسی کسٹمر کی گری ہوگی ، میں نے اس کسٹمر سے معلوم کیا، تو اس نے کہا کہ یہ رقم میری نہیں گری۔ اس صورت میں میرے لئے کیا حکم ہےجبکہ مجھے معلوم ہے کہ یہ رقم میرے علاوہ کسی اور شخص کی گری ہے؟

بِسْمِ اللہِ الرَّحْمٰنِ الرَّحِیْمِ

اَلْجَوَابُ بِعَوْنِ الْمَلِکِ الْوَھَّابِ اَللّٰھُمَّ ھِدَایَۃَ الْحَقِّ وَالصَّوَابِ

پوچھی گئی صورت میں جبکہ آپ کو یقینی طور پر معلوم ہے کہ یہ پیسے کسی سے رہ گئے ہیں اور ان کے مالک کا علم نہیں تو یہ لقطہ ہے اور لقطہ کا حکم یہ ہے کہ اصل مالک کی تلاش کے لئے ممکنہ حد تک تشہیر کی جائے ۔آپ کو چاہیئے کہ دکان میں آنے جانے والوں سے معلوم کریں یا دکان پر لکھ کر لگادیں کہ اگر کسی کی کوئی چیز گم ہوئی ہے، تو رابطہ کرے ۔اگر مالک مل جائے، تو اسے یہ رقم دے دیں، یوں آپ بریٔ الذمہ ہوجائیں گے۔ البتہ اگر اس کے باوجود بھی کسی طرح اصل مالک کا پتا نہ چلے، تو یہ رقم اپنے پاس حفاظت کی غرض سے رکھ لیں اور جب اس کے مالک کے ملنے کی امید نہ رہے، تو کسی شرعی فقیر کو دے دیں یا کسی بھی ثواب والے کا م میں صرف کردیں ، تاہم یہ ذہن میں رکھیں کہ صدقہ کرنے کی صورت میں آپ برئ الذمہ تو ہو جائیں گے،لیکن اگر پھر کبھی اصل مالک مل جاتا ہے اور وہ صدقہ کرنے سے راضی نہیں ہوتا، تو آپ کو یہ رقم اپنے پاس سے دینی ہوگی۔